REDACCIÓN PERSOAL: “Só
fai falla estar todos implicados”
É irónico que algúns morran de fame e
outros usemos esa mesma expresión para indicar que se nos abre o apetito; é
inimaxinable que algúns morran de fame e outros por comer en exceso e sen necesidade;
é inxusto que algúns morran de fame e outros comamos cos ollos, tiremos coa
comida. Esta lista podería seguir, pero non se trata de sentirnos culpables por
onde nacemos, se non polo que facemos, polos nosos actos; trátase de comezar
por facernos donos deles, e seguir por valorar o que temos, e continuar por
axudar en canto poidamos.
Pensaremos que non existen recursos
suficientes para a enorme cifra que xuntos sumamos, pero o peor é que a falta
de auga e alimento en boa parte do mundo non se debe á falta de auga e alimento
na outra boa parte do mundo; porque cada día no noso planeta prodúcese alimento
dabondo para 12.000 millóns de persoas. Somos preto de 7.000 millóns, 850
millóns teñen serios problemas para alimentarse diariamente e ata 6 millóns de
nenos morren cada ano como consecuencia da fame, pregunta, que é o que estamos
a facer mal?
Todos podemos ser superheroes?, quen sabe,
pero está claro que as cousas só son posibles se se intentan, porque o que si é
inxusto e sentir pena polos que non foron tan afortunados e logo non mover un
dedo para intentalo. Sempre está ben soñar cun mundo no que nazas onde nazas
teñas as mesmas oportunidades e dereitos, pero está mellor pensar en maneiras
de conseguilo; porque queiramos ou non este mundo leva sendo inxusto moitos
moitos anos, o que non significa que o teña que ser outros moitos anos máis.
Isto non é un “Se queremos colaborar a facer un mundo máis xusto podemos…”, é
un “Como temos que colaborar a facer un mundo máis xusto debemos…”, é o noso
deber, porque é o noso mundo e só nós somos os seus responsables. Se non somos
nós os que actuamos non haberá ninguén que actúe por nós. Mundo só existe un e
temos a sorte de ser os seus residentes e os primeiros que deberían estar
interesados en melloralo, tan só fai falla estar todos implicados.
Irea García Fernández 3º B
Ningún comentario:
Publicar un comentario